Elm və Təhsil Nazirliyinin İqtisadiyyat İnstitutunda “Ağdaş rayonunun strateji sosial-iqtisadi inkişaf istiqamətləri” layihəsi çərçivəsində növbəti işçi toplantı keçirilib.
Tədbirdə İnstitutun baş meneceri Şakir Alıyev, layihənin koordinatoru, şöbə müdiri, professor Tərbiz Əliyev, layihənin ekspertləri – iqtisad elmləri doktoru Allahyar Muradov, dosent Mahir Zeynalov, iqtisad üzrə fəlsəfə doktoru Vilayət Ramazanov və elmi işçi Minarə Ağayeva iştirak ediblər.
Toplantıda çıxış edən layihənin koordinatoru professor Tərbiz Əliyev iyunun 8–10-da rəhbərliyi altında layihə tədqiqatçılarının Ağdaş rayonuna həyata keçirdikləri işgüzar səfər barədə məlumat verib. Bildirilib ki, səfər çərçivəsində rayonun müxtəlif qurumlarının nümayəndələri, sahibkarlar və mütəxəssislərlə görüşlər keçirilib, rayonun sosial-iqtisadi inkişaf potensialının qiymətləndirilməsi üçün zəruri məlumatlar və materiallar toplanıb.
Müzakirələr zamanı layihə üzrə aparılan elmi tədqiqatların gedişi, Ağdaş rayonunda sahibkarlar və mütəxəssislər arasında keçirilmiş sorğunun emalının nəticələri, eləcə də əldə olunmuş ilkin qənaətlər diqqətə çatdırılıb. Sorğu nəticələrinin rayonun iqtisadi inkişaf prioritetlərinin müəyyənləşdirilməsi və gələcək inkişaf strategiyasının hazırlanması baxımından əhəmiyyət daşıdığı vurğulanıb.
Tədbirdə həmçinin layihənin növbəti mərhələləri üzrə görüləcək işlər, qarşıda duran vəzifələr və tədqiqat prosesinin təşkilati məsələləri ətrafında geniş fikir mübadiləsi aparılıb.
Qeyd edək ki, “Ağdaş rayonunun strateji sosial-iqtisadi inkişaf istiqamətləri” layihəsinin əsas məqsədi rayonun mövcud iqtisadi potensialının, müqayisəli üstünlüklərinin və inkişaf imkanlarının elmi əsaslarla araşdırılması, dayanıqlı sosial-iqtisadi inkişaf üzrə prioritet istiqamətlərin müəyyənləşdirilməsidir.
