Elm və Təhsil Nazirliyinin İqtisadiyyat İnstitutu ilə Türkiyənin EGE Universitetinin Türk Dünyası Araşdırmalar Mərkəzi ilə birgə təşkilatçılığı ilə 2026-cı ilin payızında keçirilməsi nəzərdə tutulan beynəlxalq elmi simpoziumun təşkili məsələləri müzakirə olunub.
Tədbirə İqtisadiyyat İnstitutunun baş direktoru, professor Nazim Müzəffərli, EGE Universiteti Türk Dünyası Araşdırmalar Mərkəzinin rəhbəri, prof. Atif Akgün və onun müavinləri - prof. Həmit Özman və prof. Alimcan İnayət, eləcə də hər iki qurumun bir qrup əməkdaşı qatılıb. Müzakirələr professor Rəsmiyyə Abdullayevanın moderatorluğu ilə aparılıb.
Görüş zamanı beynəlxalq simpoziumun təşkilinə dair bir sıra mühüm məsələlər ətrafında fikir mübadiləsi aparılıb. Müzakirələrdə simpoziumun təşkilati və koordinasiya işləri, proqramın hazırlanması, texniki məsələlərin həlli, eləcə də tədbirə digər universitet və elmi-tədqiqat qurumlarının cəlb edilməsi imkanları nəzərdən keçirilib.
Tərəflər simpoziumun əsas tematik istiqamətlərinin müəyyənləşdirilməsi, elmi məruzələrin qəbulu və qiymətləndirilməsi mexanizmləri, həmçinin konfrans materiallarının toplanması, nəşri və beynəlxalq elmi bazalarda indeksləşdirilməsi məsələləri barədə də ətraflı müzakirələr aparıblar.
Görüşdə vurğulanıb ki, beynəlxalq elmi simpoziumun keçirilməsi Azərbaycan və Türkiyə alimləri arasında elmi əməkdaşlığın daha da genişlənməsinə, aktual iqtisadi problemlər üzrə birgə tədqiqatların təşviqinə və elmi nəticələrin beynəlxalq səviyyədə tanıdılmasına mühüm töhfə verəcək.
Müzakirələrin yekununda tədbirin təşkili istiqamətində işlərin işçi qaydada davam etdirilməsi barədə qərar qəbul olunub. Bu məqsədlə hər iki qurumu təmsil edən əməkdaşlardan ibarət birgə işçi qrupu yaradılıb. İşçi qrupunun qarşıdakı aylarda konfransın proqramı, təşkilati mexanizmləri və beynəlxalq tərəfdaşlarla əməkdaşlıq məsələləri üzrə fəaliyyətini davam etdirəcəyi bildirilib.
Qeyd edək ki, İqtisadiyyat İnstitutu ilə EGE Universiteti arasında elmi əlaqələrin inkişafı və birgə tədbirlərin təşkili hər iki qurumun beynəlxalq əməkdaşlıq strategiyasının mühüm istiqamətlərindən biridir. Planlaşdırılan beynəlxalq konfransın iqtisadiyyat elminin aktual problemlərinin müzakirəsi və yeni elmi əməkdaşlıq imkanlarının formalaşdırılması baxımından əhəmiyyətli platformaya çevriləcəyi gözlənilir.
