İyunun 21-də AMEA İqtisadiyyat İnstitutunda növbəti onlayn elmi seminar keçirilmişdir. Seminarı giriş sözü ilə açan AMEA İqtisadiyyat İnstitutunun direktoru, i.e.d., professor Nazim Müzəffərli tədbirin əsas müzakirə mövzusu və məruzəçi barədə məlumat verib.
Seminarda İnstitutun Aqrar islahatlar və ərzaq təhlükəsizliyi şöbəsinin aparıcı elmi işçisi, dosent Yunus 
Sadıqov "Qlobal ərzaq təhlükəsizliyi indeksinin əlçatanlıq subindeksi üzrə Azərbaycanın mövqeyi və onun yaxşılaşdırılması yolları (The Economics yurnalının hesabatı əsasında)" adlı məruzə ilə çıxış edib. Məruzəçi bildirib ki, Qlobal Ərzaq Təhlükəsizliyi İndeksi İngiltərənin “The Economist” jurnalı tərəfindən layihələndirilmiş, hesablanmış və tərtib edilmişdir. Bu indeks 1996-cı ildən - Dünya Qida Sammitindən sonra 113 ölkələr qrupu üzrə ərzaq məhsullarının mövcudluğu və yetərliliyi, keyfiyyəti kimi əsas məsələləri nəzərdən keçirir. İndeks həm inkişaf etməkdə olan, həm də inkişaf etmiş ölkələrdəki ərzaq təhlükəsizliyinin 26 göstəricisi əsasında kəmiyyət və keyfiyyət balı kimi müəyyən edilir. Tədqiqat üzrə ən yüksək qiymət 100 baldır. Tədqiqatın ümumi məqsədi ölkələr üzrə ərzaq təhlükəsizliyi ilə bağlı vəziyyəti qiymətləndirməkdir
Azərbaycan 2018-ci ildə Ərzaq təhlükəsizliyi indeksində 113 ölkə üzrə 58,2 balla 56-cı yerdə qərar tutmuşdur. Asiya və Sakit okean hövzəsi 
ölkələri (23 ölkə) içərisində isə 9-cu yerdə qərarlaşmışdır. Bu indeks üzrə son 7 ildə (2012-2018) reytinqimiz 12,7 bal , 2017-ci ilə nisbətən isə 0,4 bal artmışdır. Başqa sözlə, son 7 ildə 45,5 baldan 58,2 bala yüksəlmiş, reytinq cədvəlində 67-ci yerdən 56-cı yerə qalxmışdır. Ölkənin ərzaq təhlükəsizliyini şərtləndirən əsas amillər: ölkədə ərzaq məhsullarının istehsal səviyyəsi, ərzaq məhsullarının istehsalının iqtisadi cəhətdən sərfəliliyi, ərzaq məhsulların qiymətlərinin səviyyəsi, əhalinin alıcılıq qabiliyyəti, əhalinin gəlirləri və orta aylıq əmək haqqı səviyyəsi, dövlət tərəfindən aztəminatlı təbəqələrə verilən güzəştlər və müavinətlər, dövlətin ərzaq ehtiyatları və sairdir.
Y.Sadıqov qeyd edib ki, hesabatı hazırlayan təşkilat ölkələr üzrə ərzaq təhlükəsizliyi indeksini 3 əsas kateqoriya üzrə hesablayır: əlçatanlıq, mövcudluq, keyfiyyət və təhlükəsizlik. Əlçatanlıq subindeksi üzrə reytinqdə Azərbaycan 61 balla 54-cü yerdədir. Bu subindeksin ərzaq təhlükəsizliyi indeksində çəkisi 40%-dir. Mövcudluq subindeksi üzrə reytinqində Azərbaycan 61 balla 51-ci yerdədir. Bu subindeksin ərzaq təhlükəsizliyi indeksində xüsusi çəkisi 44%-dir. Keyfiyyət və təhlükəsizlik subindeks üzrə reytinqdə isə ölkəmiz 43,4 balla 86-cı yerdədir. Bu subindeksin də əsas indeksə təsiri 16%-dir.
Məruzəçi Y.Sadıqov Qlobal Ərzaq Təhlükəsizliyi İndeksində Azərbaycanın mövqeyinin daha da yaxşılaşdırılması üzrə təklif və tövsiyələrini səsləndirmişdir.
Sonra məruzəcilər sualları cavablandırmış, mövzu ətrafında müzakirələr aparılmışdır (economics.com.az).
