İyunun 13-də AMEA İqtisadiyyat İnstitutunda növbəti onlayn elmi seminar keçirilib. AMEA İqtisadiyyat İnstitutunun baş direktoru, i.e.d., professor Nazim Müzəffərlinin (İmanov) sədrliyi ilə keçirilən tədbirə bir sıra ali təhsil müəssisələrinin əməkdaşları da qatılıblar.
Seminarda İqtisadiyyat İnstitutunun “Xarici iqtisadi fəaliyyətin tənzimlənməsi” şöbəsinin aparıcı elmi işçisi, i.f.d., dosent Samirə Abasova 
“Azərbaycanda yaşıl şəhərlərin tətbiqi: müasir vəziyyət, problemlər, perspektivlər” mövzusunda məruzə ilə çıxış edib. Müasir şəhərsalmanın başlıca prinsipləri, əsas xüsusiyyətləri barədə danışan məruzəçi yaşıl, sağlam və eko şəhərlərin müqayisəli təhlilini verib, əsas üstünlüklərindən bəhs edib. Yaşıl texnologiyalar üzrə qabaqcıl beynəlxalq təcrübə, xüsusən də Almaniya, Sinqapur və Fransanın yaşıl iqtisadiyyat, müasir infrastrukturun qurulması, nəqliyyatın idarə olunması, ağıllı və smart şəhərlər barədə məlumatlar təqdin olunub.
S.Abasova bildirib ki, yaşıl şəhərlər rabitə və ictimai nəqliyyatı idarə etmək üçün müasir rəqəmsal texnologiyalardan istifadə edirlər. Yaşıl şəhərlərdə yalnız ictimai nəqliyyat, velosipedlə hərəkət, elektriklə işləyən 
avtomobillərdən istifadə nəzərdə tutulur. Azərbaycanın böyük şəhərlərinin yaşıllaşdırılması ilk növbədə yaşıllıq zolaqlarının artırılması, yeni parkların yaradılması; məişət tullantılarının növlərə ayrılması; atmosferin karbon qazı tullantılarından qorunması üçün ictimai nəqliyyata müraciət edilməsi; müəyyən günlərdə şəxsi avtomobillərin şəhərdə istifadəsinə qadağa qoyulması; əhali və yerli idarəetmə orqanları ilə kooperasiyanın yaradılması əsasında baş verə bilər. Ölkəmizdə yaşıl şəhərlər təcrübəsinin tətbiqi o zaman mümkündür ki, belə şəhərlər sıfırdan xarici investorlardan böyük vəsaitlərin cəlb edilməsi və dövlət subsidiyaları hesabına yaradılsın. Yaşıl şəhərlər digər şəhərlərdən onunla fərqlənir ki, əhali müxtəlif idarəetmə növləri üzrə yerli hakimiyyət orqanları ilə birgə qərarlar qəbul edir.
Sonra suallar cavablandırılıb. Seminarda Bakının ekoloji problemləri və onların həlli yolları, paytaxtın köçürülməsi məsələləri, tullantıların düzgün idarə olunması, nəqliyyat sıxlığının azaldılması, yaşıllıqların artırılması, əhalinin yaşıl şəhərsalmada iştirakı, şəhərlə kənd arasındakı fərqlərin aradan qaldırılması, ekoloji mədəniyyətin formalaşdırılmasının əhəmiyyəti ətrafında geniş müzakirələr aparılıb (economics.com.az).
