Məlum olduğu kimi, Azərbaycan Respublikasının Prezidenti 5 yanvar 2023-cü il tarixində “Əhalinin sosial rifahının yaxşılaşdırılması sahəsində əlavə tədbirlər haqqında” Sərəncam imzalamışdır.
Bu Sərəncamla minimum aylıq əməkhaqqı 1 yanvar 2023-cü ildən 345 manata çatdırılıb. Məlum olduğu kimi, bu artımdan əvvəl ölkədə minimum aylıq əməkhaqqı 300 manat idi. Beləliklə də minimum aylıq əməkhaqqında 15 faiz artım olub. Dövlətin maliyyələşdirdiyi sahələrdə çalışan işçilərin aylıq tarif (vəzifə) maaşları da bir ay müddətində bu Sərəncama uyğunlaşdırılacaq və minimum əməkhaqqının artımı vahid tarif cədvəlinin (VTC) bütün pillələri üzrə əməkhaqlarında artımları təmin edəcək. Ümumilikdə, dövlət sektorunda çalışan 700 min nəfər insan bu artımlardan faydalanacaq.
Bundan başqa, müvafiq Sərəncama əsasən Nazirlər Kabineti əmək pensiyasının minimum məbləğinin 280 manata çatdırılmasına, sosial müavinətlərin və təqaüdlərin məbləğlərinin artırılmasına dair təkliflərini 10 gün müddətində hazırlayıb Azərbaycan Respublikasının Prezidentinə təqdim etməlidir. Bu artım 100 minədək pensiyaçını əhatə edəcək.
İqtisadiyyat İnstitutunun İnklüziv sosial inkişaf şöbəsinin müdiri, iqtisad elmləri doktoru Rəsmiyyə Abdullayeva economics.com.az saytına müsahibəsində bildirib ki, ümumilikdə 1,9 milyon nəfəri əhatə edəcək bu artımlar əhalinin sosial müdafiəsini gücləndirəcək. İqtisadçı ekspert qeyd edib ki, ikirəqəmli inflyasiyanın (2022-ci ildə inflyasiya səviyyəsi 14,5 faiz olub) fonunda bu artımlar zəruri idi: “Qeyd olunan qərarlar əhalinin həmin qruplarının gəlirlərini artırmaqla onların sosial vəziyyətini yaxşılaşdıracaq. Pensiyaçılar və müavinət alanlar əhalinin həssas və aztəminatlı qruplardan olan insanlardır. Onların sosial müdafiəsinin gücləndirilməsi hökumətin sosial siyasətinin prioritetidir və bu müdafiə tədbirləri davam etdirilməlidir”.
Azərbaycan Respublikasının Prezidenti 9 dekabr 2022-ci il tarixdə “Azərbaycan Respublikasında 2023-cü il üçün yaşayış minimumu haqqında Azərbaycan Respublikasının Qanunu”nu da təsdiq edib. Bu Qanunda 2023-cü il üçün ölkə üzrə yaşayış minimumu 246 manat müəyyənləşdirilib. Göründüyü kimi, minimum əməkhaqqı bu il üçün müəyyən olunan yaşayış minimumunu (246 manat) 40,2 faiz üstələyib.
Azərbaycan Respublikasının Prezidenti 9 dekabr 2022-ci tarixdə “Azərbaycan Respublikasında 2023-cü il üçün ehtiyac meyarı haqqında Azərbaycan Respublikasının Qanunu”nu təsdiq edib. Bu Qanunda 2023-cü il üçün ölkə üzrə ehtiyac meyarı 246 manat müəyyənləşdirilib. İqtisadçı-ekspert qeyd edib ki, Azərbaycanda ünvanlı dövlət sosial yardım mexanizmi 2006-cı ildə tətbiq edilib. İlk dəfədir ki, bu il ehtiyac meyarı yaşayış minimumuna bərbarələşdirilib. Bu müsbət haldır. O, bildirib ki, çoxsaylı sosial normativlər (minimum əməkhaqqı, yaşayış minimumu, ehtiyac meyarı və s.) sosial müdafiədə müəyyən problemlər yaradır. “Yaşayış minimumu haqqında” Azərbaycan Respublikasının Qanununa (5.4. maddə) görə “Azərbaycan Respublikasında minimum əməkhaqqı və pensiyaların minimum məbləği mərhələlərlə ölkə üzrə yaşayış minimumu səviyyəsinə yüksəldilir”. Hazırki vəziyyətdə artıq həmin hədəfə nail olunub və artıq minimum əməkhaqqı artaraq yaşayış minimumu məbləğini keçdiyindən qanunvericilikdə də müvafiq düzəlişin edilməsinə zərurət yaranıb (economics.com.az).
