Oktyabrın 27-də ETN İqtisadiyyat İnstitutunda AMEA-nın 80 illik yubileyinə həsr olunmuş elmi seminarda İnstitutun Demoqrafiya və məşğulluq problemləri şöbəsinin müdiri, AMEA-nın müxbir üzvü, i.e.d., professor Şahbaz Muradov məruzə ilə çıxış etmişdir.
İnstitutun baş direktoru, professor Nazim Müzəffərlinin sədrliyi ilə keçirilən seminarda məruzəçi ilk növbədə bu elm məbədinin tarixinə nəzər salıb, onun keçdiyi inkişaf yolundan, Azərbaycanda fundamental elm sahələrinin formalaşmasında və tərəqqisindəki rolundan danışıb. Bildirib ki, Akademiya yarandığı dövrdən indiyədək Azərbaycanda əsas elmi mərkəz rolunu oynayıb. Ötən dövrdə ölkəmizdə elmi məktəblərin formalaşması və inkişafı məhz Azərbaycan Milli Elmlər Akademiyasının 80 ildəki ən böyük nailiyyətlərindəndir. Akademiyanın ötən müddət ərzindəki səmərəli fəaliyyətinin əsasında elmin zamanın tələblərinə uyğun prioritet problemlərinin araşdırılması, ən müxtəlif elmi istiqamətlər üzrə yüksək hazırlıqlı kadrların yetişdirilməsi, elmi məktəblərin formalaşdırılması və nüfuzlu beynəlxalq elm qurumları ilə qarşılıqlı əlaqələrin genişləndirilməsi prinsipləri dayanmışdır.
Prof. Ş.Muradov qeyd edib ki, AMEA cəmiyyətimizə, iqtisadiyyatımıza alimlər ordusu bəxş edib. Yeni nəsil elmi kadrların hazırlanmasında akademiyanın mühüm rolu olmuşdur. Onlar Azərbaycanın intellektual potensialının əsasını təşkil edir. Bu gün akademiyanın həqiqi və müxbir üzvləri ölkəmizin ali təhsil sistemində, dövlət idarələrində, müxtəlif elmi təşkilatlarda, AMEA-nın institutlarında çalışır, Azərbaycan elmini daha da irəli aparır. Alimlərimiz dövlətimizin göstərdiyi böyük etimad müqabilində, dövlət siyasətinə öz dəstəyini verməklə yanaşı, həm də cəmiyyət quruculuğuna, milli-mənəvi dəyərlərimizin qorunmasına, iqtisadiyyatın inkişaf etdirilməsinə öz töhfələrini veriblər. Alimlərimiz bu gün Azərbaycan elminin formalaşmış ənənələrini davam etdirməklə yanaşı, dövlətimizin milli maraqlarına uyğun şəkildə və dünya elminin müasir çağırışlarına uyğun olaraq fəaliyyətlərini davam etdirirlər. Bu gün də Akademiya elm sahəsində dövlət siyasətinin uğurla həyata keçirilməsində fəal iştirak edir, cəmiyyətin yeni biliklərə yiyələnməsi və elmi-mədəni səviyyəsinin yüksəldilməsinə öz töhfəsini verir.
AMEA-nın müxbir üzvü Ş.Muradov Azərbaycanda iqtisad elminin inkişafında müstəsna rol oynamış, uzun illər AMEA-nın tərkibində fəaliyyət göstərmiş İqtisadiyyat İnstitutunun ötən dövrdə uzunmüddətli səmərəli fəaliyyətindən, nailiyyətlərindən də söz açıb. Alim bu gün də elmi-tədqiqat institututları arasında İqtisadiyyat İnstitutunun fəaliyyətinin xüsusilə seçildiyini, müsbət imicinin formalaşdığını qeyd edib. Bildirib ki, Azərbaycanda fundamental və tətbiqi iqtisadi araşdırmaların əsas mərkəzlərindən biri olan İqtisadiyyat İnstitutunda aparılan elmi-tədqiqat işlərinin nəticələri elmi dairələrdə, dövlət və hökumət qurumlarında yüksək qiymətləndirilir.
Bunlarla yanaşı, alim Azərbaycan iqtisad elmi qarşısında duran vəzifələrdən, elmi və təşkilati problemlərdən də söz açıb, onların həlli istiqamətində fikir və mülahizələrini bölüşüb.
Sonra AMEA-nın 80 illik inkişaf yolu ilə bağlı maraqlı və geniş müzakirələr aparılıb.
