Noyabrın 6-da Azərbaycan Milli Elmlər Akademiyasının Rəyasət Heyətində postkonflikt ərazilərin bərpasına elmi dəstək mövzusunda tədbir keçirilib.
Tədbiri giriş sözü ilə açan AMEA-nın prezidenti, akademik Ramiz Mehdiyev Rəyasət Heyətinin AMEA-nın Qarabağ Regional Elmi Bölməsinin 
yaradılması ilə bağlı qərarını xatırladıb, bununla əlaqədar elmi bölmələrə müvafiq tapşırıqların verildiyini diqqətə çatdırıb. Akademik Ramiz Mehdiyev AMEA-nın İqtisadiyyat İnstitutunun direktoru, iqtisad elmləri doktoru Nazim Müzəffərlinin (İmanov) 2010-cu ildə nəşr olunan “Azərbaycanın postkonflikt ərazilərinin bərpası: konseptual əsaslar” adlı kitabının əhəmiyyətindən danışaraq müəllifin tədqiqatının müasir göstəricilərlə, yeni faktlar əsasında işlənməsinə ehtiyac olduğunu vurğulayıb.
Kitabın müəllifi, professor Nazim İmanov təqdimatla çıxış edib, əsərin Azərbaycan və dünya ictimaiyyətinə təqdim olunduğunu tədbir iştirakçılarının nəzərinə çatdırıb: “Bu kitabın təqdimatı Londonda – Britaniya 
Parlamentinin Lordlar palatasında, Vaşinqtonda – Mərkəzi Asiya və Qafqaz İnstitutunda, Brüsseldə – Avropa Parlamentində, Moskvada Karnegi Fondunda və Rusiya Dövlət Humanitar Universitetdə görkəmli siyasətçilərin, alimlərin, iş adamlarının iştirakı ilə keçirilib və müzakirələrdə müsbət rəylər alıb”. Direktor bildirib ki, Qarabağdan köçkün düşmüş soydaşlarımız arasında aparılan sorğular müxtəlif istiqamətlərin müəyyənləşdirilməsinə səbəb olub. Onun sözlərinə görə, tədqiqatın mühüm istiqamətləri həyat təminatı sisteminin, infrastrukturun, mülki idarəetmə orqanları – nazirliklərin nəzdində qurum və ya şöbələrin yaradılmasından ibarətdir. Eyni zamanda nəqliyyat infrastrukturunun, telekommunikasiyanın, səhiyyə, təhsil, elm və mədəniyyət sahələrinin, o cümlədən sosial obyektlərin və peşə təlimi mərkəzlərinin bərpasını təşkil edir.
Qarabağ iqtisadiyyatının potensial üstünlüklərinin və 30 ildən sonrakı dünya iqtisadiyyatının hansı maliyyə imkanlarına sahib ola bilməsi ehtimallarından söz açan Nazim İmanov beynəlxalq maliyyə qurumlarının bu işə maraqlı olduqlarını vurğulayıb: “Baltikyanı ölkələr və İran şirkətlərindən bərpa prosesində iştirakla bağlı artıq rəsmi müraciət olunub”.
Tədbirdə AMEA Rəyasət Heyətinin bir sıra üzvləri də iştirak edərək fikir və mülahizələrini bildiriblər. Müzakirələrin sonunda Azərbaycanda Postkonflikt Ərazilərin Bərpası Elmi Mərkəzinin yaradılması haqqında qərar qəbul edilib. AMEA-nın prezidenti, akademik Ramiz Mehdiyev akademiya üzvlərinin bu proqramda yaxından iştirakının vacibliyini vurğulayıb, bu istiqamətdə tövsiyə və layihələrini təqdim etmələrini məqsədəuyğun hesab edib.
